Cíor Thuathail

Is beochan ghearr í Cíor Thuathail faoi dhéagóir agus an nealtrú ag goid a máthair uaithi. Leanann sé Jules Madden agus a saol iompaithe tromach tramach ó d’éirigh a máthair tinn leis an ngalar Alzheimer. Léirithe ag Sciob Sceab i gcomhpháirt leis an Lab—Ionad Ealaíona na Gaeilge sa Daingean—tá Cíor Thuathail guthaithe le cainteoirí dúchasacha ó Chorca Dhuibhne agus beoite ag Gobstar Film.

Taispeánfar Cíor Thuathail ag féilte scannáin i 2018 sa ghnáth-leagan cineama agus i leagan VR. Sea! Chuala tú i gceart! Tá an chosúlacht air go mbeidh Cíor Thuathail ina chéad scannán VR riamh i nGaeilge!

Agus a chamchuairt críochnaithe aige , díolfar Cíor Thuathail in “eagrán foghlama” do mhéanscoileanna. Cuireann Cíor Thuathail—An Eagrán Foghlama an bheochan i mbeart le leabhrán a spíonann amach a tagairtí d’Eachtraí Eilíse i dTír na nIontas agus don ghalar Alzheimer.

Fiosracht ort? Léigh ar aghaidh le tuilleadh a fháil amach faoi Chíor Thuathail ó thaobh plota de.

Jules agus Máire ag féachaint suas sa spéir

Achoimre ar scéal Chíor Thuathail 

Agus a saol iompaithe tromach tramach ó d’éirigh a máthair Máire tinn, chuirfeadh an chíor thuathail i saol laethúil Jules eachtraí Alice i dTír na n-Iontas i gcuimhne duit. Cinnte tá blas ag Jules ar an mbrú atá ar Alice dreach stuama a choinneáil uirthi féin nuair a chasann sí le Banríon na gCroíthe ag imirt cróice le lasaireán mar mháilléad agus ghráinneog mar liathróid.

Nií haon rud as an ngnáth do Jules anois teacht ar leabhar sa mheaisín níocháin nó bróga sa chuisneoir, nó pinn luaidhe curtha i bpota de chré amhail síolphlandaí.

Agus dála Alice ag siúl go ciúin ionas nach gcuirfidh sí fearg ar Bhanríon na gCroíthe, tá Jules cleachtaithe anois ar gan faic a ligint uirthi féin aon uair a dhéanann a máthair rud ait. Mar éiríonn Máire trína chéíle má tharraingíonn a hiníon aird ar a hiompar ait agus ba sheacht mheasa í a láimhsiú ansin.

Ach ‘sí an fhadhb leis an gcur chuige seo ná, an mó a chlíonn Jules le meascán méaraí a máthar ar mhaithe le hí a laimhsiú—ag aontú léi go bhfuil an dubh ina bhán agus suas síos—an mó a bhraitheann sí go bhfuil a greim ar cad atá fíor ag sleamhnú.

Lean Jules síos poll an choinín ar aistear atá iontach agus go brónach réadúil ag am am céanna.

maire-a-tharraingt-on-bhfarraige

04da3e72-511e-41ba-812c-757b4d8599aa